Այս հրահանգը նախատեսված է նոր թեմայի ուսումնասիրությունից առաջ անցկացվող կարճ, նպատակային և գործնական հայտորոշիչ գնահատման ամբողջական բովանդակությունն արհեստական բանականության օգնությամբ կազմելու համար։ Այն ԱԲ-ին ուղղորդում է ոչ միայն ստեղծել հարցեր և առաջադրանքներ, այլև վերլուծել նոր թեմայի յուրացման նախապայմանները, մեկնաբանել սովորողների պատասխանները և ուսուցչին առաջարկել դրանցից բխող հետագա գործողություններ։

Հրահանգով ԱԲ-ն նախ ուսումնասիրում է ուսուցչի հաղորդագրությունն ու կցված նյութերը և չի կրկնում արդեն տրամադրված տվյալների վերաբերյալ հարցերը։ Եթե որևէ անհրաժեշտ տեղեկություն բացակայում է, հարցերը տրվում են հերթականությամբ՝ մեկական։ Յուրաքանչյուր պատասխանից հետո ԱԲ-ն վերլուծում է ստացված տեղեկությունը և միայն ապա տալիս հաջորդ անհրաժեշտ հարցը։ Հարցադրումը շարունակվում է այնքան ժամանակ, մինչև բավարար տվյալներ հավաքվեն հիմնավորված հայտորոշիչ գնահատում կազմելու համար։

Այսպիսով՝ հրահանգը հայտորոշիչ գնահատումը կապում է ուսուցման հետագա կազմակերպման հետ։ Այն օգնում է ուսուցչին ոչ միայն պարզել, թե սովորողը ինչ գիտի կամ չի կարողանում կատարել, այլև հասկանալ դժվարության հավանական պատճառը և ընտրել համապատասխան քայլը՝ անմիջապես սկսել նոր թեման, անցկացնել կարճ կրկնություն, հարմարեցնել ուսուցման առաջին փուլը կամ կազմակերպել նպատակային լրացուցիչ աջակցություն։

ԱԲ-ի ստեղծած նյութը վերջնական մասնագիտական որոշում չէ։ Ուսուցիչը պետք է ստուգի առաջադրանքների համապատասխանությունը ծրագրին, դասարանի իրական պայմաններին և սովորողների կարիքներին, իսկ անհրաժեշտության դեպքում լրացուցիչ հրահանգներով փոփոխի կամ լրացնի փաթեթը։ Վերջնական որոշումը և հայտորոշիչ գնահատման արդյունքների մանկավարժական մեկնաբանման պատասխանատվությունը մնում են ուսուցչին։