Ներառումը ժողովրդավարական հասարակության մասին մարդու երազանքի մարմնացումն է, որտեղ մարդկանց ոչ մի խումբ մեկուսացված չէ, և բոլորի շահերը հաշվի են առնվում ու հարգվում այլ մարդկանց կողմից:«Ներառում» նշանակում է հավասարապես հնարավորություն և պայմաններ ստեղծել բոլոր երեխաների, այլ ոչ թե առանձին խմբի երեխաների համար՝ առանց տարբերակման և դասակարգման: Կրթության համակարգում համընդհանուր ներառումը բխում է որոշակի սկզբունքներից, այն է

• յուրաքանչյուր երեխա ունի կրթության հիմնարար իրավունք և պետք է հնարավորություն ունենա ստանալ և հասնել գիտելիքի ընդունելի մակարդակի,
  • յուրաքանչյուր երեխա ունի բացառիկ առանձնահատկություններ, հետաքրքրություններ, ունակություններ և կրթական կարիքներ,
  • ԿԶԱՊԿ ունեցող երեխաները պետք է կրթություն ստանան ՆՈւՀ-երում՝ բնականոն զարգացում ունեցող երեխաների հետ միասին, որտեղ պետք է ապահովվեն նրանց համար համապատասխան պայմաններ, մշակվեն նրանց հետ աշխատելու մեթոդներ, տեխնոլոգիաներ, մոտեցումներֈ

ՆՈւՀ-երում համընդհանուր ներառումը ենթադրում է՝

• բոլոր երեխաներն ունակ են սովորելու
  • ներառական հասարակության կառուցման հեռահար ռազմավարական գաղափարի իրականացում:
  • բոլոր երեխաների կարիքներին համապատասխան կրթական գործընթացի կազմակերպում և իրականացում
  • ընդունվում և հարգվում են երեխաների տարբերությունները՝ զարգացման խնդիրները, անհատական առանձնահատկությունները, ընտանիքի սոցիալական կարգավիճակը, սոցիալ-մշակութային տարբերությունները

Այսպիսով, նախադպրոցական ուսումնական հաստատություններում համընդհանուր ներառումը կոչված է ապահովելու յուրաքանչյուր երեխայի ներգրավվածությունն ու մասնակցությունը կազմակերպվող գործընթացներին, դարձնել նրանց խմբի մասնակից և անդամֈ Այն միտված է ստեղծելու հավասար պայմաններ բոլոր երեխաների համարֈ Այն ենթադրում է յուրաքանչյուր երեխայի համար իր զարգացման առանձնահատկություններին համապատասխան անհրաժեշտ պայմանների և հարմարեցված միջավայրի ապահովում և դրա միջոցով կրթական գործընթացին առավելագույնս մասնակցության, ներգրավվածության ապահովումֈ